Ayollarning haq huquqi haqida

Xotin-qizlar qo'mitalari raisi lavozimlari tugatildi.

Ko'p o'qiymiz "bolasini falon pulga sotmoqchi bo'lgan ayol ushlandi" degan xabarlarni, bu kabi jinoyatlar yurtimizda avvaldan bo'lgan, shunchaki biz bilan siz ommaviy axborot vositalari rivojlangan davrda yashayabmiz.

Gap o'zbek ayoli haqida ketganda ko'z oldimda yugurishni bilmaydigan, bir kuni yirtqich hayvonga yem bo'lishini kutib turgan ohu gavdalanadi. Himoyasiz, nochor, xo'rlanish va doimiy tahqirlanishlardan yuzaga chiqish uchun eriga, akasiga, ukasiga yoki dadasiga, yana alla kimgadir mulozamat qilishga majbur bo'lgan o'zbek ayolini himoya qiladigan faqat nomi bor bo'lgan qo'mita ham tugatilibti.

Bu qo'mita tugatilishi emas aksincha isloh qilinishi kerak edi. Bir yil oldin ona chaqalog'ini hojathonaga tashlagani haqida xabar chiqdi, bir yildan keyin erini chavaqlab hojatxonaga tashlagan ayol haqida o'qidik. Ayollar qilayotgan jinoyatlarning mingtadan bittasi to'qchilikdan qilinadi, qolgani yo'qchilikdan.

Qachon o'zbek ayoli baxtli bo'ladi? Qachonki ular ham Saida Mirziyoyeva kabi rus tili, ingiliz tilida bemalol so'zlashayolsa, qachonki ularning ham erlari Otabek Umarov kabi ijtimoi tarmoqlarda rafiqasiga dil izhori qilsa, qachonki ularning ham orqasida Shavkat Mirziyoyev kabi otasi tursami?

Yo'q, ularga ozgina etibor va ertangi kuniga bo'lgan umid ham yetarli. Biz muhokama qilishni sevamiz, falonchi ayol bolasini axlatga tashlabti degan xabarga qoldirilgan muhokamalarni o'qib ko'ring orasida birontasi hukumatni ayblaganmi? Hech kim amaldagi tizim ayollarning huquqini himoya qilmayabti demagan. Eskitdan qolgan, chirib bitgan "qizbola palaxmon toshi, qayerga otilsa shu yerda qotishi kerak" degan maqollarga asoslanib minglab ayollarni qizbolaligidan miyyasini zaxarlab bir umr baxtsiz yashashga mahkum qilamiz, chidagani yashab ketadi, chidolmagani esa yomonotliq bo'ladi.

Qizbola tosh emas gul, uni shamoldan, yomg'irdan, payxon qiladiganlar, zararkunandalardan himoya qilishimiz kerak, men bilan siz emas buni qonun, hukumat qilishi kerak.

Ajrashsa 5 ta bolasi bilan ko'chada qoladi, na hunari bor, na til biladi, na uni hukumat himoya qiladi, tugatilgan qo'mitadagi fikrlamay qo'ygan masullar esa borib ahmoq erni emas, bir umr xo'rlanib kelgan ayolni yana o'sha konchinni alkash bilan yashashga ko'ndirmoqchi bo'ladi.

Hukumat ayollar haq huquqini himoya qilmayabti, ular erlariga, aka ukalariga, otasiga bog'lanib qolgan. Doimiy kamsitish, xo'rlanish, yo'qchilik va azob uqubatlardan otilib chiqqan mustaqil ayollarning aksariyati erkak harakterga ega bo'lib qoldi, siz nimani kutgandingiz?

Meni yozganlarimni oshib borsa 2 ming kishi o'qiydi, yozganlarimga hukumat reaksiya ham bildirmaydi, bo'ri o'txo'r emasligiga qanchalik ishonsam, bunga ham shunchalik ishonaman. Bir tiyinga qimmat qo'mita tugatilgani balki yaxshilikkadir, daraxt bo'lsa-yu na soyasi na mevasi bo'lmasa faqat o'tinlikga yaraydi holos.

Hurmatli amaldorlar, hozir 21-asr texnika, texnalogiya rivojlangan davr, endi o'zbek ayollari 20.30 yil oldingiday sabrli emas, endi ular hayot shunaqa ekan deb o'ylashmaydi, endi ularning nozik qo'llari paxta terish yoki ketmon ushlash uchun emasligini tushunib yetishdi. Yo siz ularni haq huqini qayta ko'rib chiqasiz, yoki ular bolasini sotishda va erlarni maydalab hojatxonaga tashlashda davom etadi.