Imkoniyatni kutmang, uni o'zingiz yarating!

RAHBAR MUNDARIJASI

 ARM JOYLASHGAN HUDUD
XODIMLAR VA QO‘SHTIRNOQ ICHIDAGI TARTIB INTIZOM

YANGILIKLARGA MOSLASHISH

SERG‘AYRATLILIK VA ISHCHANLIK

NATIJA UCHUN HARAKAT

YARATUVCHANLIK

ISHLARNI XOTIRAGA MUHRLASH

IZLANISH

REJALARNING ANIQLIGI

XULOSA

KIRISH

Aziz hamkasbim, ushbu qo’llanmada sizga faoliyatingiz davomida foydasi tegib qolishi mumkin bo’lgan tavsiyalar berilgan.

Qo’llanmada  7 yillik kasbiy tajribamga tayangan holda, Respublikamizning bir nechta viloyatlari va tumanlaridagi Axborot-resurs Markazlari, maktab kutubxonalari bilan tanishib chiqib ulardagi yangiliklar va uslublarni Markazimizda qanday tatbiq qilganim, hamkasblarim bilan ARM foydalanuvchilariga yaratgan imkoniyatlarimiz haqida imkon qadar yoritishga urinib ko’rdim.

Chapakbozlikdan qochish maqsadida,  shoir va kitobxonlar bilan davra suhbatlari, hamkor tashkilotlar bilan birgalikda uyushtirilgan tadbirlarimiz, ko’chma kutubxonalarimiz bilan ishlash, maktab kutubxonachilariga ko’rsatiladigan uslubiy yordamlar,  xullas odatiy ishlarimiz haqida yozishni lozim topmadim.

Ushbu qo’llanmadan ko’rsatilgan ba’zi uslublar balki sizning Axborot-resurs Markazingizda ancha vaqtdan buyon tadbiq qilinayotgan bo’lishi mumkin, ana shunday holatlarga duch kelsangiz “biz buni allaqachon qilganmiz” deb emas “Beknazar buni bizdan o’g'irlagan” deb fikr yuritishingiz mumkin ☺

ARM JOYLASHGAN HUDUD

Axborot-resurs markazi shahar yoki tuman markazidagi maktablarda bo’lishi har qanday tomondan ham ko’plab imkoniyatlar yaratadi. Kitobxonlarning qatnovi, reklamalar, tadbirlar, yig’ilishlar va boshqa turdagi xizmatlar uchun ham ARMning markazda bo’lishi maqsadga muvofiqdir.
Bizning Axborot-resurs markazi Jizzax viloyati, Do’stlik tumanining qoq markazida joylashgan. Do’stlik tumani aholisi ayni damda 63 ming nafarga yaqini. Tuman sanoat, korxona va fabrikalar hamda qishloq-xo’jalik bo’yicha Jizzax viloyatining ishongan tumanlaridan biri hisoblanadi. 

Do’stlik shahri 4 ta MFY va 1 ta QFY dan  iborat, Tumanda jami 19 maktab faoliyat yuritadi, shundan 5 ta maktab Do’stlik shahrida joylashgan bo’lib, bizning Axborot-resurs Markazimiz 2007-yildan buyon 14-maktab qoshida tuman axolisiga va maktab o’quvchilariga xizmat ko’rsatib kelmoqda.

XODIMLAR VA QO’SHTIRNOQ ICHIDAGI TARTIB INTIZOM

Do’stlik tumani va Axborot-resurs markazi joylashgan hududi haqida oz bo’lsa ham ta’surotga ega bo’lgan bo’lsangiz, endi Do’stlik tuman Axborot-resurs markazi xodimlari va markazimizdagi tartib-intizom haqida tanishtirib o’tsam.

Biz jamoa bilan kelishgan holda yil davomida ikki xil kun tartibida ishlaymiz. May oyidan noyabr oyigacha ishga soat 08:00 da kelsak, noyabr oyidan aprel oyigacha ish vaqtimiz 09:00 da boshlanadi. Ikkala holatda ham soat 17:00 da ish vaqtimiz tugaydi. Yozgi kun tartibimizda tushlik vaqtiga 2 soat vaqt ajratamiz. 

Ta’kidlab o‘tishimiz kerakki, hech qachon ARM xodimlari dam olish kunlari yoki ish vaqti tugaganidan keyin ishda bo‘lishmaydi. Favqulodda holatlarda ham, yuqoridan yoki xohlagan boshqa joydan tekshiruv kelgan taqdirda ham xodimlar ish vaqti tugaganidan keyin ishxonada ushlab qolinmaydi. Bizning bu odatimiz boshqa tashkilot xodimlarini ajablantiradi, aslida ham shunday bo‘lishi kerak: xodim ishga o‘z vaqtida keldimi, demak, tartib qoidaga ko‘ra ish vaqti tugaganidan keyin ketishga yuz foiz haqli.

ARM xodimlarining ishga kechikishi yoki sababsiz kelolmay qolishi ARM rahbari va jamoadan ko‘ra ko‘proq o‘sha xodimning o‘ziga nisbatan hurmatsizlik ekanini butun jamoa biladi va bunday vaziyatlarda holatga qarab chora ko‘riladi.

Jamoaning ahilligi har qanday holatda ham rahbarga bog‘liq. Rahbar ishni baravar taqsimlashi xodimlarning imkoniyatidan kelib chiqib ish yuklashi, xodimning o‘rniga o‘zini qo‘yib ko‘rib uning haq huquqini hurmat qilish shart.

Ish vaqtimiz navbatdan tashqari yig‘ilishlar bilan boshlanadi, har kuni ham yig‘ilish qilavermaymiz. Aynan qaysidir kun yig‘ilish qilishimiz esa hech qayerda belgilanmagan.

ARM xodimlari 8 nafarni tashkil qilgani uchun kunning istalgan vaqtida aniq topshiriqlar yuzasidan qisqa va samarali yig‘ilishlar qilamiz. Yig‘ilishni doim ARM rahbari sifatida o‘zim boshlab beraman. Uslubchi bilan birgalikda xodimlarga ishlar taqsimlanib, hafta davomida yoki kun davomida bajariladigan ishlar mening va uslubchining yon daftarlarimizga tartib bilan yoziladi hamda birin ketin bajarilgan ishlar ro‘yxatdan o‘chiriladi. Yig‘ilishda xodimlarning kiyinish uslubi o‘zini tutishi, foydalanuvchilar bilan xushmuomilada bo‘lishi muntazam ravishda aytib kelinadi.

 Haftaning har bir kuniga navbatchi qo‘yilgan. Bitta xodim haftada bir kun navbatchi bo‘ladi. Misol uchun ARM uslubchisi haftaning dushanba kunida navbatchi bo‘lsa, xodim dushanba kuni odatdagi ish kunidan 10 daqiqa oldin keladi va ARM eshiklarini ochish, gullarni sug‘orish, xonalarni shamollatish kabi yumishlarni bajaradi. 

Bundan tashqari, navbatchi xodim tushlikka boshqalardan bir soat oldin chiqib kelishi va xodimlar tushlikka chiqqanida, tushlik vaqtida keladigan foydalanuvchilarga xizmat ko‘rsatishi belgilab qo‘yilgan. Albatta, bularning barchasini jamoa bilan kelishgan holda belgilab olganmiz.

YANGILIKLARGA MOSLASHISH

 "Hamma narsa o‘zgaradi. Eng katta ahmoqlik

– bu o‘zgarishlarga moslashish emas, balki ularni to‘xtatishga urinish. Har bir insondagi qimmatbaho narsa bu o‘zgarishlarga qodirlik."

Ayni damda yurtimizdagi o’zgarishlar, aholi va sohalarga kirib kelayotgan yangiliklar bilan yonma-yon yurish, ularning barchasidan xabardor bo’lish va moslashish har bir ARM xodimining vazifasi hisoblanadi.  Markazimiz 2018-yilning ilk oylaridan buyon sifatli internet xizmatidan foydalaniladi. Foydalanuvchilarga ham tegishli tartib qoidalar orqali simsiz internet (WI-FI) xizmati yo’lga qo’yilgan.

Bugungi kunda ARMni internetsiz tasavvur qilish qiyin bu hech qanday mantiqqa to’g’ri kelmaydi. Axborot-resurs markaziga qo’yiladigan birinchi talab bu sifatli internet tarmog’iga ulangan bo’lishligi.
Markazimning telegram messenjerida 2017-yil 7-fevral kuni DustlikARM nomi bilan ochilgan kanali mavjud. Hozir kanalimizning 300 nafarga yaqin foydalanuvchisi bor. Telegram kanalimizda 6 yuzdan ortiq elektron kitoblar mavjud bo'lib kanalda turli yo’nalishlarda xabarlar ham chiqaramiz, Axborot-resurs markazi faqat kitoblar bilan cheklanib qolmasligi kerak, degan fikrda ish yuritamiz.

https://t.me/DustlikARM

        Axborot-resurs markazi xodimlarining internet tarmoqlarida faol bo’lishi xodimlarning bir maqsad yo’lida harakat qilishiga imkon yaratadi. Bundan tashqari har bir ARM xodimi zamonaviy texnologiyalardan qisman bo’lsa ham xabardor bo’lishi kerak. Markazimiz xodimlari telegram kanalidan tashqari Axborot-resurs Markazimizning www.dustlikarm.zn.uz saytini va facebook.com saytida  dustlik arm saxifasini ham yuritib borishadi

https://facebook.com/dustlik.arm

www.dustlikarm.zn.uz


SERG'AYRATLILIK VA ISHCHANLIK

Rahbarlar xodimlaridan ajralib turuvchi  beshta sifatga ega bo’lishi kerak.

•    Serg'ayratlik va ishchanlik;
•    Ijodiy fikrlash;
•    Kelajakni "ko'rish" qobiliyati;
•    Jamoaviy qurilish;
•    Faol ma'lumotlar almashinuvi;

Odatda tuman ARMlarga viloyat Axborot-resurs markazlaridan badiiy kitoblar beriladi. Bir yilda 180 dona yoki ikki yilda 60 dona kitob olish bilan cheklanardik. Kitoblarining sonda ko’pligi nomda esa ozligi foydalanuvchilarning kitobga bo’lgan talabini qondirmasdi. Bu xuddi “bersang yeyman, ursang o’laman” degan maqolni amaldagi ko’rinishiga o’xshardi. Bunga chek qo’yish maqsadida 2017-yil 18-yanvar kuni Do’stlik tuman hokimi nomiga kitob va jihozlar so’rab yozma murojaat qildik. Avvaliga tuman moliya bo’limi og'zaki ravishda mablag’ yo’q degan vajni keltirdi. Yakunda esa biz qisman bo’lsa ham natijaga erishdik.

Balki biz ko’p narsaga erishmagandirmiz lekin ushbu masalada oz bo’lsa ham tajribaga ega bo’ldik. “Qoyadan yiqilayotgan bo'sangda, uchishga harakat qil, hech narsa yo'qotmaysan”, deb bejizga aytishmagan. O’zlashtirgan bu tajribamiz bilan biz 2018-yilning IV-choragida Axborot-resurs markazimizni kuzatuv kameralari bilan jihozlash va yana kamida 1000 donani kitob xarid qilish maqsadini rejalashtirganmiz.

Axborot-resurs markazi vazifalaridan biri maktab kutubxonachilari bilan ishlash ularga uslubiy yordam ko’rsatish bo’lgani uchun biz kutubxonachilar bilan ishlashda ko’p qiyinchiliklarga duch keldik. Bu qiyinchiliklarga barham berish kutubxonachilarning o’z ishlariga bo’lgan munosabatini yaxshilash maqsadida. “O’qimagan kitoblaringiz sizni jazolaydi”, "Kutubxonachining ham ahvolini so’raydiganlar bormi?", deb nomlangan maqolani yozishga qaror qilgandim. Bu maqolani ommaga ma’lum qilishdan oldin maqolam o’zimga muammo bo’lib ishimga tasir qilsa nima qilaman deb ikkilanib qoldim. Shunda hayolimda  RIZQ - Allohning ne'matidir, uni Alloh beradi, bandasi emas, degan hikmat o’tdi. Bu hikmatni qayerda o’qiganim esimda yo’q, lekin qaysidir ishga qo’l ursam avvalo shu hikmatni bir bora hayolimdan o’tkazaman. Maqolam uchun ko’p yaxshi gaplar eshitdim, Lekin, natija bermaganidan haligacha hayronman. Nima bo’lganda ham maqsadimga yetish uchun kutubxonachilar mavzusida chuqurroq izlanishlar olib borishni, samarali natijalarga erishishni rejalashtirib qo’yganman.

2012-yilning dekabr oyida  “O’quvchilarda kitobxonlik madaniyatini shakllantirish  bo’yicha eng yaxshi Konsepsiya muallifi” ko’rik tanloviga ham sohadagi kamchiliklar va ularni bartaraf qilish uchun takliflarimni, 13 varaqdan iborat Konsepsiya yuborgan edim. Ushbu tanlovda “Eng yaxshi g’oya muallifi” nominatsiyasini qo’lga kiritdim. mana oradan 6 yil o’tgan bo’lsa ham g’oyalarim amalda qo’llanilmadi. Yuqorida ta’kidlaganimdek, bu safar ham tajriba orttirish bilan cheklanib qoldim. Biroq umidni uzmasdan o’sha vaqtdagi g’oyalarimni amalda qo’llash imkoniyatlarini har tomonlama o’ylab faqat o’zimga ayon bo’lgan istiqbol rejamga kiritib boryapman.

Hozir gap faqat ish haqida emas mansab yutuqlari muhim ahamiyatga ega bo'lsa xam. O'z kuningizni, o'zingizni va oilangizni qanday qilib yanada baxtliroq qilish mumkinligi haqidagi g'oyalar bilan boshlang. Bu dunyoga siz qanaqa yaxshilik olib kela olasiz? Shaxs bo'lib o'sish uchun o'z oldingizga maqsadlar qo'ying.

“Bir maqsad tomon asta-sekinlik bilan yurib borishing, maqsadsiz yurishingdan afzaldir.” 

NATIJA UCHUN HARAKAT  

Bajarayotgan ishingizni yaxshi ko'rishingiz - muvaffaqiyatga erishish kalitidir.

Rahbarlik - bu mas’uliyat,  ayniqsa, ko’pchilikning taqdirini o’zgartirib yuborishning imkoni borligi sizning qo’lingizda ekanini bilib tursangiz, yanada ko’proq mas’uliyat his qilasiz. Axborot-resurs markaziga a’zo bo’lish uchun kelgan har yangi foydalanuvchining kelajagini yaxshilash uning dunyo qarashini o’zgartirish u orqali boshqa foydalanuvchilarni ham ARMga jalb qilish mumkinligi doim yodimda turadi. Foydalanuvchilarning bizni xizmatlarimizdan mamnun bo’lishi, bizning nima maqsadda ishlayotganimizni tushunib yetishlari uchun doimo markazimizda yangilik qilishga harakat qilamiz.

Misol uchun 2015-yilda kitob  javonlarimizga qo’l bola uslubda ishlov berib o'zgartirganimiz orqali, foydalanuvchilarga kitob tanlashda qulaylik yaratishga erishdik.

Hozirgi kunga kelib markazimizning xizmat ko’rsatish bo’limidagi barcha kitob javonlarni shu uslubda o’zgartirib chiqqanmiz. Ushbu uslubni tumandagi maktab kutubxonalarida ham qo’llayotgan kutubxonachilarimiz bor.

         Bunday qilishimizning yana bir sababi, bizga  bir necha yildan buyon yangi kitob javonini berilmayotganligida ekanligini ham ta’kidlab o’tishim kerak.

         

           Aziz hamkasbim sizlarga ham vaqtingizni va bir oz jismoniy mehnatingizni sarflab eski kitob javonlaringizni ko’rgazmali kitob javonlarga o’zgartirishingizni tavsiya qilaman. 

          Bunday kitob javonlarning yana bir afzalligi, oz miqdordagi kitob fondingizni ko’p qilib ko’rsatib foydalanuvchining va o’zingizning ko’zingizni quvontiradi. Sinab ko’ring, natijasini amalda ko’raverasiz.

Albatta, kitob javonini o’zgartirish bilan ish bitmaydi Yuqoridagi suratlarda ko’rib turganingizdek men kutubxona qoidalarida ko’rsatilmagan uslublardan foydalanib, kitoblarni foydalanuvchilarning talab va takliflariga inobatga olib bo’limlarga bo’lib chiqqanman.

Bunday uslub yana bir bor foydalanuvchilarga qulaylik yaratish uchun qilingan. Kitobxon istagan mavzusidagi kitobni osongina topib olib, vaqtini tejashi, hamrohiga tavsiyalar berishga ham imkon topishi mumkin.

2017-yilning dekabr oyida tuman moliya bo’limidan fondimiz uchun ajratilgan 5 million so’m mablag’ga Jizzax viloyatidagi “Matbuot tarqatuvchi” MCHJ bilan shaxsan o’zim borib shartnoma qildim.  Faxriy kitobxonlarimizdan markazimizda qanday kitoblar ko’rishni xohlashlarini so’rab, imkon darajasida ular so’ragan kitoblarni ortig’i bilan, nomda 380 ta, sonda 600 dona kitoblar olib kelib foydalanuvchilarga taqdim etdik.

Kitoblarni qaysi do’konlardan olganim, qanchadan olganim, qanday qilib tanlaganim, ishxonaga qaysi yo’l bilan olib kelganimning va bunga qancha vaqt ketganligi haqida yozsam, sizlarga atalgan mundarijam ancha cho’zilib ketishi mumkin ekan. Barchasini o’zingiz bosqichma-bosqich uddalasangiz, o’zingiz uchun tajribaga, ishxonangiz uchun natijaga erishgan bo’lasiz.

YARATUVCHANLIK

"Baxtiyorlik – bu yaratuvchanlik hissidan lazzatlanishdir".

Markazimiz yig’ilishlarini qanday tashkil qilishim haqida aytib o’tganman, lekin ushbu bo’limda yig’ilishlarimiz haqida qo’shimcha qilinadigan narsalar bor, bu sizga g’alati tuyulsa ham, eng mayda elementlargacha yig’ilishda aytiladi. Ishxonadagi o’rindiqning eskirganligi, yaroqsiz holga kelgan chiroq, boring, hatto, chelakning ahvolini ham muhokamaga qo’yamiz.

Hech nima jamoa  bilan  muhokama qilinmasdan hal qilinmaydi. Yashirish kerak emas, supurgi, chelak, lampochka, ruchka - xullas, davlat tomonidan talab qilishga hijolat bo'ladigan buyumlarni xizmat ko’rsatishdan tushgan, mablag’lar evaziga olamiz. Qaysi yuz bilan moliyaga supurgi yoki chelak uchun pul ajrating, deb borish mumkin, ularning o’zlari bular haqida bila turib mablag’ ajratmaganidan keyin?!

Ana shunday yig’ilishlarining birida foydalanuvchilar sonini oshirish, tuman aholisiga o’z xizmatlarimizni taklif qilish maqsadida xodimlar o’rtasida e’lon yozish mavzusida kichik topshiriq berdim va bunga muddat belgiladim. Har  bir xodim o’zining fantaziyasini ishga solib foydalanuvchilarni jalb qilish uchun e’lonlar yozib kelib menga taqdim qilishdi. Aynan bittasini tanlamasdan biz e’lonlarni umumlashtirib yaqqol bitta e’lon yaratdik va bu e’londan 500 yuz dona chiqarib tuman bo’ylab tegishli tashkilotlarga, odamlar serqatnov ko’chalarga, maktab, kollej, mahalla va bozordagi e’lonlar doskalariga yelimlab chiqdik. Bu ishimiz kutlganidan yaxshi natija berdi, minglab kitobxonga ega bo’lmasak ham, minglab odamlarga qayerda tekinga kitob o’qishi mumkinligi haqida ma’lumot berdik.

E’lon bilan tanishgan insonlar Axborot-resurs markazini qiyinchiliksiz topib kelishlari va kelganidan afsuslanmasliklari uchun imkon darajasida harakat qildik.

 ISHLARNI XOTIRAGA MUHRLASH

 Ishtaha ovqat payti keladi deganlaridek, tajriba ham ish davomida bo'ladi.

Ko’rib turganingizdek, qo’llanmamda foydalanilgan suratlarim bugun yoki kecha tushirilgan sur'atlar emas. Markazimizdagi har bir oddiy o’zgarishni ham tasvirga olib, ijtimoiy taroqlarimizdagi sahifalarimizga joylab boramiz.

Bu ham o’zim uchun shijoat beradi. Bo’sh vaqtimda sahifalardagi suratlarni ko’rib chiqib yana nimalar qilishimiz mumkinligi, oxirgi marta qachon yangilik qilganimiz haqida bilib turaman.

Ma’lumot uchun men ARMda rahbarlik lavozimiga tayinlangan vaqtimda, ARM ochilganiga 5 yil bo’lganligiga qaramay  maktab tomonidan atigi ikkita xona va shu xonalarga mos jihozlar ajratilgan edi.

Ba’zida uzoq safarga otlansam yoki ta’tilga chiqsam, muntazam ravishda xodimlarimga ijtimoiy tarmoqlardagi sahifalarimizga ARMdagi ayni vaziyatni suratga olib joylashini so’rayman. Bu uslub orqali ham xodimlarni nazorat qilish uchun, ham ishxonadagi holatdan xabardor bo’lib turish uchun imkon yaratadi. Ana shunday sur'atlardan ba’zilarini e’tiboringizga havola etaman. E’tibor bilan kuzatsangiz, suratlar orasidagi vaqtni jihozlarning joylashuvidan ham bilib olishingiz mumkin.

2011-yil 1-dekabr holati

2013-yil 1-dekabr holati

2018-yil 27-iyul holati 

XIZMAT KO’RSATISH XONASI

ELEKTRON XIZMATLAR XONASI

KITOBLARNI SAQLASH VA XODIMLAR XONASI

IZLANISH

Muvaffaqiyat – bu tasodifan erishiluvchi hodisa emas, bu tinimsiz mehnat, izlanish, o’rganish va qilinayotgan ishni mehr bilan qilish natijasidir.

Suratlarni ko’rish jarayonida, balki, sizda elektron xizmat ko’rsatish xonasi yuzasidan “Moddiy texnik ta’minoti bilan yaxshi ta’minlangan” ekan, degan fikr paydo bo’lgandir. Yo’q bizda ham viloyatimizdagi boshqa tuman Axborot-resurs markazlari kabi 3 dona kompyuter va 1 dona printer mavjud xolos. Siz suratlarda ko’rgan noutbuk, rangli printerlar va boshqa Axborot-resurs markazlarida uchramaydigan jihozlarni bizni markazimizda borligining o’ziga yarasha sababi bor.

2016-yilda Bektoshov Javlon degan yigit bilan og’zaki kelishuvga erishdik. Uning kichikkina foto studiyasi bor edi. Kelishuvga ko’ra u bizning ishxonamizga bor ish qurollari bilan ko’chib keldi.

Bunday kelishuvdan ikkala tomon ham manfaatdor bo'ldik. Javlon uchun soliqsiz, ijara va elektr energiya to’lovisiz barcha qulayliklarga ega joy bo’lsa, biz uchun har kun yangi foydalanuvchilar va eng afzal tomoni, rangli printer va foto apparatlardan tekin foydalanish imkoni edi.

Ba’zi sabablarga ko’ra hamkorimiz o’zining biznesini tugatishiga to’g’ri keldi. Ayni damda biz yana 3 dona kompyuter va 1 dona printerimiz bilan qolganmiz.

Yangi o’quv yili uchun o’zimizga va jamoamizga mos keladigan bir nechta foto studiyalar bilan suhbatlashib turibmiz. Kelishuvga erishsak, yana hamkorlikni yo’lga qo’yamiz.

Siz ham ushbu uslubdan foydalanib ko’ring, buning uchun sizning Axborot-resurs markazingiz tuman markazida bo’lishligi yaxshi natija beradi.

Ishonchim komil, endi ish boshlayotgan foto studiyalarga ijara to’lovisiz, soliqlarsiz, elektr energiya uchun to’lovlarsiz va eng muhimi tekin internetdan foydalanish imkonini beradigan taklif bilan chiqsangiz sizga yo’q deyolmaydi.

REJALARNING ANIQLIGI

 "Eng yaxshi ustoz-bu tajriba. Qimmatga o'rgatadi lekin aniq tushuntiradi"

Odamlarni 4 toifaga ajratish mumkin:

1.     Hech qanday orzuga ham, maqsadga ham ega bo'lmagan  insonlar

2.     O'z orzusiga ega, lekin oldiga aniq maqsad qo'ymaganlar

3. Orzu-istaklari va unga erishishni mo'ljal qilgan, ammo muvaffaqiyatga erishishiga bir qadam qolganda taslim bo'luvchilar

4. Aniq orzulari, maqsadlari va unga yetishish yo'lida tuzilgan rejalar bilan, oxirigacha borish ishtiyoqidagi odamlar.

Tumanimiz markazi, ya’ni Do’stlik shahri boshqa tumanlarga nisbatan sanoat korxonalari, maktablar, hokimiyat binolari, banklar va boshqa tashkilot hamda korxonalar aholi istiqomat qiladigan hududlar bilan yonma yon va zich joylashgan.

Maktablardan uncha uzoq bo’lmagan, hatto, oraliq masofa 100 metrni tashkil qiladigan joylarda kompyuter o’ynashga moslashgan klublar bor. Yoshlarni o’ziga tortadigan bunday klublar soni 5 yoki 6 donani tashkil qiladi, bunday joylarda muntazam ravishda yoshlarni, ba’zida esa yoshi katta insonlarni ham uchratish mumkin.

Karvon ko’p-rizqi bo’lak. Klublarda ham qaysidir tadbirkor mablag’ tikib ish boshlagan, ularning faoliyatiga chek qo’yish yoki aralashish bizning faoliyatimizga kirmaydi. Lekin ular bilan raqobatlasha olamiz, biz kompyuterda foydali o’yinlarni o’rnatishimiz, internet xizmatlarini taklif qilishimiz va bu xizmatlardan tushgan mablag’larga kitob fondimizni boyitishimiz, jihozlarimizni yangilab olishimiz, xodimlarimizni rag’batlantirishimiz  mumkin. Bunday uslubni 2014-yil Alisher Navoiy nomidagi O’zbekiston Milliy kutubxonasida malaka oshirishga borganimda uchratganman.

 Nima uchun kompyuter klublarida taqiqlanmagan narsa bizga taqiqlanishi kerak? Nima uchun bizda taqiqlangan narsa ularda taqiqlanmagan bo’lishi kerak? Ikkalamizga ham bitta yurtning, bitta viloyatning va bitta tumanning boshqa boshqa odamlari keladi. Shu kabi savollarga amalda javob topish uchun 2020-yilning 1-yanvar kuniga qadar Axborot-resurs markazimizda ham kompyuter xizmatlariga moslashgan kamida 10 dona Noutbukga ega bo’lgan xona ajratishni rejalashtirganmiz.

Yuqorida ta’kidlaganimdek, biz tadbirkorlarga o’xshab soliq, ijara, elektr energiya va ishchiga ish haqi to’lamaymiz. Kun davomida qiladigan odatiy ishimizni qilamiz xolos. Ustiga-ustak, bizda pullik xizmat nizomi, elektron muhandis va tarmoq ma’muri lavozimlarida ish yuritadigan xodimlarimiz ham mavjud, nega bunday imkoniyatlardan unumli foydalanmasligimiz kerak?

Hozirda Jizzax viloyati tuman Axborot-resurs markazlaridagi kompyuter jihozlarining qariyb 30 foizi yaroqsiz yoki ta’mirtalab holatda, 40 foizi talabga javob bermaydi, qolgan 30 foizi esa xodimlarning o’zidan ortmaydi.

Ma’lumot uchun tuman Axborot-resurs markazlariga taqdim qilingan kompyuterlarning 3 donasiga 10 yil, 1 donasiga 6 yildan oshdi.

Men shaxsan borib ko’rgan tuman Axborot-resurs markazlarining kompyuter xizmatlari xonasidagi kompyuterlar soni 4 donadan hech oshmagan, ularning ham kamida 1 donasi ta’mirtalab holatda bo’lgan.

Yuqoridan o’z ixtiyorlari bilan kompyuterlar yoki boshqa ARM uchun beriladigan jihozlarni kutish o’z ishimizning tomirlariga bolta urish bilan barobar.

Quyida sizlarga 2020-yilning 1-yanvar kuniga qadar foydalanuvchilarning jalb qilish, ularning sonini oshirish uchun markazimizda yana nimalar bo’lishi kerakligi, yana qanday xizmatlarni joriy qilishimiz va foydalanuvchilarga qulaylik taqdim qilish maqsadida ARMga olib kelmoqchi bo’lgan jihozlarimizning sur'atlarini va taxminiy narxlarini keltiraman.

ARM fondidagi kitoblar va foydalanuvchilar buyumlarini yo’qolishining oldini olish maqsadida barcha xonalarga kuzatuv kameralar o’rnatish
2 000 000 (ikki million) so’m atrofida

Kamida 10 dona Acer yoki Lenovo noutbooklari.
25 000 000 (yigirma besh million) so’m atrofida

Kompyuter xizmatlari xonasiga 1 dona konditsioner 3 500 000 (uch million besh yuz ming) so’m atrofida

Foydalanuvchilar va ARM xodimlari uchun Dispenser qurulmasi 1 000 000 (Bir million) so’m atrofida

 

Aksariyat xollarda Axborot-resurs markazi kutubxona ekanini bilmaydigan insonlarga duch kelaman. Buni sababi oddiy: maktablarda yoki kollejlarda tashkilotlar bilan tanishtiradigan fan yo’q, hech qaysi fan tashkilotlarni qisman bo'lsa ham tanishtirmaydi. Istasangiz, maktabning 10-sinf o’quvchilaridan tumanimizdagi Moliya yoki Ijtimoiy ta’minot tashkiloti nima vazifani bajaradi? deb so’rab ko’ring, hammasi har-xil javob beradi: Kimdir ko’chadan eshitganini, kimdir tvda ko’rib tushunganini va yana kimdir bular haqida eshitmaganini. Axborot-resurs markazi haqida ham shunday javob olishimiz mumkin. Hatto, kattalar orasida ham ARM haqida oz bo’lsa ham tushunchasi yo’qlari uchrab turadi. Shularni inobatga olib ko’chalarga  Axborot-resurs markazi deb yozilgan e’lonlarimizni KUTUBXONA deb o’zgartirishni, kichikroq yozuv bilan Axborot-resurs markazi deb yozishni rejalashtirdik.

XULOSA 

"Hamma gap - xatolardan saboq olishda. Xatolarning sababini o'rganib,       xulosa chiqaring. Biron bir ish qilmagan odamgina hech qanday xato qilmaydi."

Tanasi boshqa, dard bilmas, deganlaridek, balki, kimgadir bizni bu qilgan ishlarimiz arzimasdek ko’rinishi mumkin. Lekin oxirgi bir necha oyni hisobga olmaganda qog’ozda ko’rsatilmagan, bu yerda yozilmagan, ishxonamizdan tashqarida, uyimizdan yiroqda, o’zligimizga qarshi turgan holda bajargan ishlarimizni ham inobatga oling.

Men rejalashtirgan ishlarimning xomaki nusxasini sizlarga misol tariqasida havola etdim. Yil boshida tuman Xalq ta’lim bo’limi va viloyat Axborot-resurs Markazi tomonlaridan tasdiqlanadigan yillik ish rejalarimizda yuqoridagi bajarilgan yoki rejalashtirilgan ishlarimiz ko’rsatilmaydi. Bu rejalar sizning va jamoangizning yon daftariga yoziladigan ishlar, ularga erishish uchun bor imkoniyatlaringizni ko’rib chiqing.

Hozirgi kunda ko’plab muhokamalarga sabab bo’layotgan ta’lim tizimidagi o’zgarishlarning havosidan Axborot-resurs markazlari ham nafas oladigan bo’lsa, balki, shundan keyin mening ushbu uslubiy qo’llanmamni xonangizning bir chekkasiga uloqtirib yuborarsiz.

Jizzax Viloyat, Do’stlik tuman Axborot-resurs markazi rahbari:  Beknazar  Raxmatov
Mening ijtimoiy tarmoqlardagi sahifalarim ↓

https://m.facebook.com/beknazar.raxmatov

https://m.twitter.com/uzraxmatov

https://m.ok.ru/beknazar.xd

http://braxmatov.blogspot.com

https://t.me/beknazar_raxmatov